Ancora fono electi tre savii a terraferma, sier Marco Zorzi fo savio a terraferma, sier Alvise Venier fo savio a terraferma, et sier Beneto Zustignam fo cao dil consejo di X. I qualli do introno, et etiam il 3.° al tempo suo.
     
      [1498 08 26]A dì 26, domenega matina, vene lettere di Pisa di 22. Come i nemici erano andati il zorno avanti a campo a Buti, ch'è mia ... di Pisa, tenuto per pisani, nel qual era tre contestabeli con fanti ... videlicet Jacometo da Novelo. Et che havia bombardato da 4 hore di note fino la matina, et che non potendo più defendersi, quelli contestabili si haviano reso in descrition.
     
      Item, che nel primo intrar, i nimici feno qualche crudeltà et quelli tre contestabeli li mandono a Fiorenza presoni, lo resto di fanti despogliati li lassono andar, et cercha cinque bombardieri over schiopetieri li tagliono le man, et cussì tagliate apichate al collo li remandono in Pisa.
     
      Item, che il campo nostro era impaurito, et che nium si mosse per voler dar socorso, imo si duol di la compagnia di don Ferante et di uno conte Boscheto, che è il capo di quella compagnia, che fece dar una voce per il campo che si anderia ben a socorer Buti, ma che il nostro proveditor non voleva etc.
     
      Item, si lamentò de' stratioti che non volseno cavalchar, i qualli voleano danari etc. Conclusive, ha grandissima paura. Et ditte lettere non fo bene etc.
     
      Et cussì inteso, per esser quel zorno gram consejo, fo ordinato da poi consejo di far pregadi. Et cussì tamen fo leto lettere et nulla fu fato, né disputato di far la risposta a li oratori fiorentini; ma ben ordinato che tutti, marti a dì 28 di questo dovesseno venir con le lhoro opinione, perché si risponderia a dicti oratori.