Et in questo zorno fo discoverto l'orologio dorado etc.
     
      [1498 08 29]A dì 29 dito, fo preso parte in pregadi che Domenego Malipiero proveditor di l'armada dovesse immediate venir al governo di Pisa et di quella citade. Et Piero Duodo proveditor in campo dovesse rimaner, et che di le galie dovesse far come meglio a lui pareva, o farle tirar et star in le Foze et in Arno, overo poner uno vice proveditor etc.
     
      Item, perché la galia sua era zà mexi 40 che era fuora et li galioti non voleano più star, perhò fu preso di far il zorno seguente gran consejo, et far in suo loco proveditor di l'armada. El qual, la dominicha sequente, dovesse poner bancho, et subito andar via con la galia che armerà in questa terra, et tuor una dalmatina che li darà Nicolò da cha' da Pesaro proveditor è in Arzipielago, et con dite galie vadi verso Pisa, et quelle vechie vengino a disarmar. Et cussì, a dì 30, fo consejo, et electo Simon Guoro era stà podestà et capitanio in Cao d'Istria, et avela in scrutinio di 3 balote, et poi di 13 da Pier Soranzo era stà proveditor a Otranto, fo di sier Vetor cavalier e procurator, et in gran consejo rimase dal ditto di ... ballote. Et cussì aceptoe.
     
      [1498 08 30]A dì 30, fo pur pregadi, et steteno fino hora una di nocte. Et le cosse non andavano bene di Pisa. Fiorentini erano grossi. Haveano in campo lhoro homeni d'arme 600, 700 balestrieri et zercha 10 milia fanti, et nostri non erano per la mità. Et vene lettere di ... di Piero Duodo proveditor, date pur in borgo di Pisa, el qual dimostrava haver gran paura.