Item, che ivi era venuto uno di li Bajoni, videlicet el signor Grifoneto, el qual havia notifichato quelli che con nui si conzono in hordine con 100 homeni d'arme. Li manchava li altri 50, li quali [1070] li anderia fazando. Et volendo do balestrieri per uno homo d'arme, sarà in conzo. Et Paulo da Fuligno dotor, nominato di sopra, era ivi zonto con li danari portoe a' Bajoni, et che li havia dicto che a Perosa dovea venir 4 contestabeli di fiorentini per far alcuni provisionati e fanti, et che volendo cussì esso nostro proveditor, questi che con nui sono conduti, videlicet Bajoni, non li lasserano far si ben dovesse far novità in la terra.
     
      Item, che il signor di Piombino era conzo con fiorentini, come per altre vie si intese, con 150 homeni d'arme, el qual tramava di condurse con nostri, chome ho scripto di sopra. Et pisani, li mandoe alcuni oratori a Piombino a dolerse, che havendo promesso di esser in ajuto lhoro et con la Signoria, a questo modo li haveano lassati.
     
      Item, che intendeva esso nostro proveditor el conte Ranuzo di Marzano esser venuto in Val d'Arno come capitano di fiorentini con 200 homeni d'arme. Et che Piero de' Medici di brieve intendeva saria con lui congionto con 200 homeni d'arme et alcuni fanti, siché, concludendo, pregava la Signoria dovesse ordenarli quello havesse a far, o andar a Pisa, o andar con Piero verso Fiorenza, o altrove.
     
      El ducha de Milam, in questi giorni, scrisse una lettera a la Signoria, et el suo orator fo in collegio, dicendosi voria adatar queste cosse, et che lui orator si offeriva.