El morbo è passato. Sono morti mori in la cità dil Cajaro 792042 (sic) fina al presente, mamaluchi doa milia, zudei 1200, cristiani 700.
     
     
      Capitolo di una lettera di sier Marin Malipiero, data a dì 17 lujo.
     
      Per lettere di Famagosta de' 15 lujo, el zorno avanti, li zonse una barcha de cristiani da Tripoli. Aferma quel luogo esser resanato. Apresso, Cartibei partì da Damasco a dì 7 lujo, con gran exercito tra cavali et pedoni et guastadori da 12 milia, con zape, padili et pale de ferro et cosse assaissime. Dicono va per farse soldam al Cajero, et altri dice per altre cason. Molti mamaluchi che erano con Cartibei in campo, essendo andati al Cajaro, è stà mal visti dal signor soldam, et non li ha voluto aceptar. Et molti altri mamaluchi li dal (sic) diodar che erano scosi al Cajero, sono insiti fuora et ben visti dal soldam, et vano al castelo. Et questo medemo ho mi per lettere da Tripoli.
     
     
      1498 a dì 17 avosto in Modon. -
      Copia di uno capitolo scrito per misier Nicolò da cha da Pesaro provedador di l'armada,
      et ricevuto a dì 7 septembrio 1498.
     
      A dì 6 de l'instante, nel far del dì, partendome da la terra de Metelin, zercha mia 6 luntam me scontrai in uno schierazo de turchi, armado, de portada di 300 e più botte, con do coverte et anche el cassaro molto cavalcharoso, qual venia a vela con pocho vento. E datoli lengua che 'l dovesse calare, come la raxon voleva dovesse far non essendo homeni de mal afar, et tanto più quanto erano stà avertidi da una barcha de turchi quali se trovò con el spectabile misier Lorenzo Loredam al partir suo da mi del nostro esser in quelle aque, et che andavemo [1072] zerchando corsari et homeni di mal far, et che a li altri che trovavemo a tutti fazevemo bona compagnia, et che i resposeno che non ariano paura de 10 galie, facendose quodammodo beffe.