El capitanio Jacomo de Tarsia è ferido in una gamba de un pasador, tamen non haverà mal. Gorlino, à buto una sasata ne la testa e fuzite passando Arno. Questo è praecise quanto seguite. El magnifico misier Domenego Malipiero avanti ieri zonse de qui con 3 galie, ché in vero à dà gran conforto a questo populo. I nimici se meteno in hordine e dano danari a le fantarie sue, e ne fano di le altre per piar impresa contro de nui, quale non pò esser salvo o Cassina o Librafata o qui. Nui, per quanto podemo, atendemo a proveder ditti luogi, e femo guardar un monte chiamato Montemazor che signoriza Librafata da fanti 300, e de lì femo lavorar un bastion. A la tore de Foza, simelmente femo meter in forteza, et a Cassina se fa quelli repari che se puol, per haver carestia de guastadori. Lì dentro haveremo a la summa de fanti 1000. Marco Capo etiam è stà preso in la scaramuza. Da ozi nui ussissemo fuora con bona parte di le zente d'arme e fanterie e molti stratioti avanti, quali azonseno li nimici che ritornavano molto ordenadamente, el qual ne era la persona de Paulo Vitelo con alcune squadre de zente d'arme, et haveva un grosso squadron di ballestrieri e schiopetieri a cavalo, per il che non parse a' nostri de darli dentro. El conte Ranuzo de Marzano è andà a la volta di Siena con homeni d'arme 150, et ballestrieri 60. Alia non sunt. Ex burgo Pisarum etc.
     
      È da saper, che questa impresa di Pisa ogni giorno veniva più dificile, et li passi si seravano. Senesi si acordono con fiorentini, et ebbeno per capitoli Montepulzano che perhò lo tenivano, siché nostri non have da' senesi quello speravano.