De qui non se mancha di far quel che si puol in defension dei luogi nostri, et aspetarli con bon animo; ma ben è vero, se nui potesemo haver da 3000 boni fanti con i qual possamo socorer e mantenir Montemazor, non ce potriano tuor Librafata. Avanti eri, fui de lì con misier Filippo Albanese a sopraveder e solecitar quelle cosse. Questa terra non sta senza qualche suspeto e timor, vedendo le cosse de Roma e de Romagna scorer pur in longo, né etiam far divertir le forze che hanno i nimici qui a l'incontro nostro, salvo che intendiamo zà terzo zorno esser partido de campo un capitanio di ballestrieri quale è de Cità de Castelo, cugnato di Paulo Vitello, con ballestrieri 30, et andato a caxa sua. Tamen, à fento andar per causa de mal franzoso. Vitelozo etiam, zà tre zorni, à le doje, et è in letto per causa di ditto mal. Li inimici hanno fato condur tute le calzine che si trovava intorno a Vico, per fortifichar ditto luogo, dove haveva ruinato l'artelaria. Nui se habiamo fortificato in questo borgo quanto se ha potuto, con repari de terra, e messo alcune boche de artelarie ai lochi necessarii, e le fanterie alozate ai repari ordenadamente per la gran dificultà a farli star de fuora de la terra e maxime la note. E cussì li stratioti et etiam qualche parte de li homeni d'arme, quali dicono non poter star fuora per non haver tende, come è in effetto. Spesse volte, per eror de le scolte, maxime de note, s'à cridato arme, arme, e tutti se habiamo messo in hordine. El capitanio di le [1104] fantarie sta assai bene de la ferita.