[1498 09 22]A dì 22 dito, nel consejo di pregadi, fo una disputation di dar compagno a quel Brexan fa le galie in l'arsenal, et tamen non fu preso alcuna cossa, se [1108] non di far do proveditori sora l'arsenal el primo pregadi.
     
      Et da Fiorenza. Vene lettere a li soi oratori, et il mandato plenario di poter agere et concluder acordo con la Signoria nostra, sichome fu preso di darli auditori, intervenendo il magnifico orator yspano che voleva veder di adatar le diferentie. Et cussì, fono dati per collegio questi: Marco Antonio Morexini cavalier consier, Alvise Bragadin procurator savio dil consejo et Zorzi Corner cavalier savio a terraferma. Et cussì in nomine Domini, a dì 23, la domenica mattina, comenzono ad esser insieme l'orator yspano, li tre auditori et li oratori fiorentini, et steteno longamente. Quello pratichono, adhuc non se intende. Etiam il luni da matina, a dì 24, fono insieme. Quello si potrà saper, scriverò; ma è da creder verano con altri partidi.
     
      [1498 09 23]A dì 23 ditto, nel mazor consejo, fu messo parte per li consejeri, atento che erano molti che usavano beneficii eclesiastici e tamen haveano de li oficii nostri, perhò, che de caetero niun che nostro zentilomo sia, el qual havesse o beneficio, o comenda, o pension, non potesseno esser nel nostro consortio, né usar alcun beneficio, sotto gravissime pene et esser bandizato di Veniexia e dil distreto per anni 10, non li possendo far gratia se non per 6 consejeri, tre cai di 40, 35 di 40, et li 4 quinti dil mazor consejo congregado da 1300 in suso.