A li ordeni io Marin Sanudo sollo vi fu, et li compagni fono sier Bartolomeo di Prioli, sier Marco da Molin, sier Faustin Barbo et sier Vetor Capello qual si ritrovava amalato a la Rosà in bassanese. Or fo consultato molte materie, et era tunc in setimana sier Polo Barbo savio dil consejo: et praecipue risponder al conte di Petigliano governador zeneral nostro di le zente da terra, qual dimandava licentia overo agumento et condition a' soi figlioli, el qual di la ferma havia con la Signoria sino mexi do compiva, et restava uno anno di rispeto in libertà di la Signoria nostra. Etiam, fo consultato di risponder a li oratori erano in Franza, sier Hironimo Zorzi, sier Nicolò Michiel doctor et sier Antonio Loredam cavalieri, a sue lettere de 19 de octubrio (?) ultimate recevute, et a Zuam Dolce secretario nostro, era in Aste apresso misier Zuam Jacomo Triulzi, cercha el desegno di Lombardia etc.; et fo notado di poner do decime al monte vechio. Fono alditi li oratori pisani, quali erano in extremis perché fiorentini li molestaveno assai, et perhò protestaveno etc. che Pisa non se potea più tenir; chiedevano fanti 1500 che li fosseno mandati per guardia di la piaza, li quali perhò non potevano andar per altra via se no a Pietrasanta per terra, poi con le fuste per mar tragetarli, et con la galia a le Foze di Arno, et de lì intrar in Pisa. Li fo risposto bone parole, et che diman si consulteria in collegio.
     
      [1498 10 02]A dì 2 octubrio, da matina, marti, intrai in collegio di suso. Fu il principe, leto lettere.