Li fo risposto per el principe si spazeria presto etc. Et fu mandato per dicti Prioli che si dovesseno venir a difender la matina seguente in collegio, et ordinato a li avogadori vedesse ben la cossa, et poi dovesse referir.
     
      Ancora, era qui uno messo dil ditto re di romani, [11] con lettere dil ditto re per uno Gasparo Stlinch, qual dimandava la restitution di Bassam, et dice haver investiture: qual loco è più di cento anni ch'è nostro. Et fo chiamato sier Zorzi Pixani dotor e cavalier, fo orator al re di romani, per haver il suo conseglio. Tamen, non fo terminato altro.
     
      Et fo expedita la comission, fata eri, di sier Zuan Badoer dotor, andava orator in Spagna, qual era zonto a Crema, et aspetava la ditta comissione. Et li fo scrito andasse di longo a la dreta a Zenoa, et de lì per mar transferirse in Spagna, e dimostrar a quelli reali la bona mente di la Signoria nostra verso le lhoro majestà, et di continuar in la liga, et li dovesse star per orator nostro, advisandone de li successi.
     
      Da Paris, lettere di oratori nostri di 22 setembrio. Come monsignor di Lignì andava in Bertagna con 400 lanze, zoè 200 homini d'arme et 200 zenthilomeni dil re; et che il re di romani, era fama lì, havia 30 milia persone in campo, et manteneva la guerra con il re di Franza a requisition del ducha de Milan; et che il re volea mandar in Aste lanze 1200, et aspetava lettere di Roma qual si haverà fin zorni 13. Al corier, aziò vadi presto, il re li a dato 160 scudi. Et che soa majestà volea andar a Tors per la materia di la raina per concluder il matrimonio, et in questo interim anderia a Melum.