Item, che el signor di Faenza havìa fato comandamento che tutti quelli di la Valle di Lamon si dovesse levar con lhoro arme a li bisogni in ajuto di le zente nostre. Et per collegio fo scrito una lettera al dito signor di Faenza ringraciandolo molto, et cussì al castelam.
     
      Ancora fo scrito a Rimano, a Zorzi Francho secretario nostro, dovesse far più fanti el podesse, et quelli mandar in campo, et mandatoli danari. Et fono expediti tre contestabeli de qui, con 100 fanti per uno, qualli dovesseno andar a farli subito a Rimano: zoè Malmignato, Maldonato spagnol et Schiaveto. Et fo molto biasmato li patroni a l'arsenal per l'artilarie mandate in campo, et solicitati a far polvere et altre artilarie. Et in campo si ritrovava esser Zuam Filippo Aureliano, vice collateral, qual scriveva al podestà di Ravena il tutto, per esser homo praticho et molto fedelissimo nostro.
     
      Da Siena di Alvixe Sagudino, secretario nostro. Se intese quello si have da Roma zercha senesi esser malcontenti di l'acordo fatto con fiorentini; et di quel Pandolfo Petruzi ch'è il primo homo di Siena, etc.; et che a Fiorenza li puti cridavano palle, palle ch'è l'insegna di Medici; et che voleano haver da Zuliam Gondi ducati 10 milia, qualli non li ha voluti dar.
     
      [1498 10 06]A dì 6 octubrio, in collegio, vene l'orator dil re di romani, e tolse licentia dal principe; ringratiò di la expedition. Et è da saper che in quarantia parloe questi: prima il Zanchani avogador introduxe, poi sier Piero Contarini avochato fiscal per il Focher; li rispose sier Alvixe Zorzi, poi li Prioli, per l'orator; li rispose domino Daniel Zucuol dotor avvochato; poi domino Venerio dotor avvochato; et ultimo [18] domino Bernardino di Grassi dotor avvochato; et il principe stete fino in la fine che era tardi; et posto parte di procieder contra i Prioli have 21 di la parte, 4 di no, et 6 non sincier, et poi fu posto, ita che la justicia have pur luogo, etc.