Come quel signor Pandolfo Malatesta era reduto in rocha per dubito di foraussiti, et li ha dito farà una cossa che sarà reputà savio, voria cavalchar in servicio di la Signoria. Et che domino Zuam Francesco de Capo in Sacco, doctor et cavalier, olim suo orator qui, qual fu messo suspecto, cognosuto la verità lo havìa retolto in gratia, et lo mandava qui per suo ambasador; etiam vi era uno chiamato Malatesta, qual feva le sue facende, et pochi zorni da poi in questa terra morite.
     
      Di campo etiam vene letere. Come sperava haver la rocha di Marati; et il magnifico Piero di Medici voria andar con el signor Bortolomeo d'Alviano et domino Hannibal Bentivoy avanti al logo ch'è in la sumità di le alpe, et di veder di tuor quel passo. Et che sier Jacomo Venier proveditor nostro non volleva separar le zente, et che havia preso alcuni fanti inimici andavano per aqua.
     
      Da Brexa. Come sier Zuam Francesco Pasqualigo, doctor e cavalier, capitanio, era stato a trovar el conte di Petigliano, et ditoli il voler di la Signoria nostra, el qual volleva venir qui incognito, per non disconzar le so zente di su Ojo.
     
      [21] Et fo mandato a far schiopeteri e a Brexa e a Cividal di Beluno et a Feltre, per mandar in campo. Et eri, che fo a dì 7, hessendo gran consejo suso, ne gionse qui 100 schiopetieri venuti di visentina, quelli fono statim expediti per Ravena et de lì mandati in campo. Et hessendo etiam qui uno messo dil conte Federico di Monto Alboto, qual era stà a soldo col prefeto, offeriva 25 homeni d'arme et 400 provisionati prestissimi et propinqui a l'exercito nostro.