Et cussì, per il collegio, aricordante sier Marco Zorzi savio a tera ferma, fo expedito et acetato li provisionati, et dato danari acciò subito andasse a farli, et con quelli venir in campo.
     
      Ancora eri fo acordato, per istromento, le condute con li noncii di l'Alviano et Orsino: zoè 150 homeni d'arme per uno, per uno anno di ferma, et uno di rispeto in libertà di la Signoria, et ducati 15 milia di provisione, concludendo la Signoria era su grandissima spexa, sì da Pisa come di qua; et si faceva una guerra che perhò la terra non li piaceva, e di tutto il mal causa era il ducha di Milan, qual continuo lavorava soto aqua.
     
      Da Bologna. Si have come fiorentini haveano electi 16 citadini, zoè quatro per ogni quartier, per il lhoro conseglio di otanta, ai qualli imposeno la custodia di la cità di Fiorenza, apropinquandosi contro di quella Piero di Medici, che pur haveva dentro molti partesani; et che mandavano do comessarii in campo in Val de Nievole.
     
      In questa sera, reduto il collegio in camera da basso dil principe, vene, per caxa dil principe, el signor Zuane di Gonzaga fradello dil marchexe di Mantoa, con Antimacho suo mazor secretario, Donato di Preti et quel frate Hironimo da Brexa heremita. Et sentato esso signor Zuane apresso el principe, presentò una lettera di suo fradelo di credenza, qual si sotoscriveva di sua mano propria schiavo et servidor, el Marchexe di Mantoa. Et prima ringracioe la Signoria di haver tolto in gracia et in fiol devotissimo el signor suo fradelo, qual voleva morir a' servicii di questa Signoria, et altro contento non aspetava, et che havia 150 homeni d'arme in hordine e 200 cavali lizieri, 120 stratioti, et ha mandà a far in terra todescha 500 sguizari, et have 4000 fanti prestissimi, et che vol metersi a tuto quello comandarà la Signoria.