Et è da saper che li ducati 4000 portati per Piero Rizo corier, fo presi su quel dil ducha di Ferrara, come se intese da particulari, et subito recevute ditte lettere per collegio fo scrito una bona lettera a dicti nostri proveditori, confortandoli a tenirse, et che non si mancherìa di provederli di denari et altro. Et poi in questa sera per el consejo di pregadi ne fo spazà una altra, notificandoli se li manderìa immediate assa' zente sotto un degno capitanio, et presto li atenderano.
     
      In questa matina riferite Zacharia di Freschi, secretario nostro, quello li havìa dicto Zuam Alberto da la Pigna, che era qui per nome dil ducha di Ferara, come el suo signor vorìa interponersi in adatar le cose di Pisa.
     
      Et hessendo pregadi suso, vene lettere di campo da Marati, inimici esser desesi, zoè el conte di Cajaza che havia 16 squadre, et il conte Ranuzo di Marzano squadre 12, non ancor deseso, et Fracasso havìa zente a piè, et fono a le man con nostri. Et come per lettera di Zuam Filippo Aureliano vice colateral, al podestà di Ravena drizata, come quelli di Brisegelle, venuti inimici, zoè el signor Otaviano di Manfredi et Dioniso di Naldo ivi propinquo, non erano mossi etc. Et in questo, el podestà di Ravena sier Lorenzo Zustignam fo molto laudato per le provision fate; et per sue lettere di 8 ditto, se intese del zonzer lì di 70 balestrieri dil marchexe di Mantoa, qualli erano a Forlì, et ebbeno lettere dal suo signor subito venisseno a Ravena.
     
      Da Ferrara, dil vicedomino, di 8 ditto. Come si divulgava de lì, el marchexe di Mantoa esser conzo con la Signoria nostra.