Et che nel numero di 500 nostri homini d'arme si dovea mandar a Pisa, fusse el conte Bernardin, et ozi sia eleto un proveditor in compagnia di ditto marchese ad andar a Pisa, con le condition. Fo electo sier Marco Trivixam provedador in campo; havè 1 non sincero, 36 di no et 135 di la parte et fo presa: et fu facto el scrutinio di proveditor in campo, e rimase sier Nicolò Foscarini, veniva capetanio di Verona, di 5 balote da sier Marcho Trivixam.
     
      Et fo licentiato el consejo di pregadi, dapoi fato queste provisione, et rimase consejo di X per una parola.
     
     
      [1498 10 10]A dì 10 octubrio, in collegio, vene lettere di campo da Maradi dil provedador Venier; et sotto Faenza dil ducha de Urbin. Come in consonantia scriveano la dificultà di quella impresa, et era opinion di alcuni di retrarsi di Marati, atento si perdeva tempo, et che nulla si faceva. Et volendo il ducha di Urbin venisse verso Brixegelle, dubitava vegnir per quelli di la Vale medema. El conte di Cajaza era a Oriol con squadre 16, Frachasso a Modiana con el signor Octaviano di Manfredi con 60 in 70 homini d'arme e molti partesani paesani, et il conte Ranuzo di sopra con le zente dil signor di Piombin. Voriano fanti, et mettevano l'impresa dificilima.
     
      Vene sier Nicolò Foscarini venuto capitano di Verona, et referì justa il consueto, et come Verona dà de intrada a la Signoria nostra ducati 70 milia. Et tolse respecto di acetar proveditor fino la matina seguente.
     
      Vene il fradelo dil marchexe di Mantoa, sopra [25] nominato, publice, et li fo notifichato la diliberation nostra fata eri nel senato; el qual rispose: el signor sarìa doman, e tacitamente tochoe il titolo di capitanio zeneral, come prima havìa, il suo signor sommamente desiderava.