Vene el signor Zuane di Gonzaga fradello dil marchexe di Mantoa, quel Antimacho mazor secretario, fra Hironimo heremita, Donato di Preti et uno chiamato Tolomeo, et mostrò avisi di 7 da Milano al signor marchexe dil suo orator domino Zorzi Brognolo, qual scrive come el ducha lo protestava in scriptura non si dovesse acordar con altri ma atender a la promessa soa, et aceptar il titolo di capitanio dil re di romani in Italia, et di esso ducha, che prima li deva sollamente titolo di locotenente ducal, la qual dignità havìa don Alfonxo fiol dil ducha di Ferara, et per causa di dar titolo a esso marchexe la refudoe. Etiam misier Galeazo di Sanseverino a requisition dil ducha di Milano havìa renoncià il titolo di capitano ducal, et perhò lo dava a esso marchese. Et che domino Pietro di Bonhomo, orator cesareo era a Milano, scrivea in consonantia, per nome dil suo re di romani, dovesse aceptar dicti titoli. Per la qual cossa, esso signor Zuane, per nome di suo fratello rechiedeva, et cussì etiam parloe quel Antimacho secretario, il titolo di capitanio zeneral nostro come prima havìa. Et el principe rispose non bisognava el signor marchexe stesse a domandar adesso titolo nì altro; ma li bastava esser ritornato in gratia, et che con il tempo non si mancherìa etc. Et che 'l bisogno era la presteza, et che se li darìa ducati 10 milia. Et cussì, per sier Zorzi Corner el cavalier, savio a teraferma et cassier, li fono dati et mandati ducati 500 a Roverè per far schiopetieri alemani. Item, fo scritto per le terre nostre fusse fato zercha 2000 provisionati, zoè rechiesto a li citadini volesseno dil suo servir la Signoria nostra a questi bisogni, et fo compartito in questo modo: Vicenza 500, Verona 500, Brexa 500, Asola 200 et Salò 200, et fono subito expedite dicte lettere.