Vene l'orator di Napoli per cosse particolar, [27] pregando el principe volesse expedir sier Francesco Morexini doctor, electo orator al suo re, qual era quasi varito, acciò tutti intenda l'amor che li porta la Signoria nostra, per tenir uno suo orator apresso, maxime hessendo partito il nostro vi era. Li fo risposto per el principe brievemente, et fo comesso la expedition di quello dimandava a li savii di terra ferma, zercha uno maistro Manolli et alcuni formenti tolti su una nave, quando sier Andrea Loredam capitanio di le nave la prese.
     
      Vene li avogadori di comun sier Andrea Zanchani, sier Lorenzo di Prioli et sier Polo Trivixam cavalier, ai qualli fo comesso la expedition di le zurme di le galie di Barbaria ultimamente ritornate, patroni sier Filippo Trivixam, perhochè a le scalle di l'audientia era pieno di questi marinari, cridava fusseno satisfati. Et li fo ordinato dovesse astrenzer li piezi et vender li soi nolli, et io Marin Sanudo savio ai ordeni, per esser in settimana, mi fu comesso tal cossa.
     
      Et perché per li governadori de l'intrade era sta incantà el dacio dil vin, justa il consueto, e tolto per sier Marin di Prioli fu di sier Marco per ducati 75 milia a l'anno, qual dato la soa charata, segondo il solito, fo prima el condutor dil dacio ballotà in collegio et dato sacramento per l'avogador di non esser pregadi. Have 10 de sì et 8 di no. Bisogna haver do terzi dil collegio et cazete, et iterum fo reincantada.
     
      Noto. Fo expedite per l'hordine nostro munition a San Lorenzo et a Monopoli, et come sier Tommaso Lion rechiedeva, alcune tavole e legnami.