Et da Ravena zercha l'impresa di Galiada, intervenendo quel conte di Sojano, et Jacomo Sacho seguiria.
     
      Da Brexa di retori. Come li 500 provisionati sarìano in hordine. Et da Salò di sier Vetor Trum provedador nostro, che fo ivi mandato a far balote di ferro, come tutavia si vano facendo, et le manderà de qui per la via di Verona.
     
      Vene il marchexe di Mantoa in collegio per tuor licentia, qual oltra che dimandoe conduta per quelli do notati di sopra, etiam per el suo favorito. Li fo risposto si vederia; e volse altri 1000 ducati per metersi in hordine oltra li 10 milia, et cussì li sono fati dar, pregando dovesse expedirsi prestissimo; qual si partì et andò per la via di Padoa a Mantoa.
     
      Da Padoa di sier Fantin da cha' da Pexaro, capitanio. Come eri a dì 12 era manchato di questa vita sier Beneto Soranzo podestà suo collega, a cui Idio doni requie. Et fo al primo gran consejo electo in loco suo sier Marco Bolani savio dil consejo.
     
      Ancora vene lettere dil marchexe Gabriel Malaspina. Nulla de nuovo. Qual si racomandava a la Signoria, per li castelli teniva ai confini de' fiorentini, che non fusse abandonato, sicome per il passato la Signoria nostra havia sempre fatto.
     
      Et da poi disnar fo pregadi, et vene lettere di campo da Marati dil proveditor Venier. Come si volea levar di l'impresa, et dimandava che subito subito venisse in suo aiuto el ducha di Urbino con le zente, perché inimici erano su le arme, et il signor Bortolomeo d'Alviano et Zuam Paulo Manfron erano fato antiguarde, et Jacomazo da Veniexia et Meleagro da Forlì erano ritrati, zoè haveano ritrato l'artilarie di la rocha et lassato il borgo di Marati, sono venuti ad alozar a Bovolemo ch'è loco securo; et come inimici erano squadre 25 et 4000 fanti, zoè il conte Ranuzo, il conte di Cajazo et il signor di [34] Piombino.