Et benché si voleva intrar in la materia dil conte di Pitiano, qual era qui con 25 persone e per la Signoria nostra si fa le spexe; ma perché el feva la luna, mandoe esso conte a pregar non si volesse poner ozi alcuna cossa per esser combustion, per atender molto a l'astrologia; e cussì fo licentiato el consejo, et li savii col collegio rimasene in cheba a consultar, quid fiendum in materia di Pisa, et steteno fino hore do di note. Et in hoc interim, vene:
     
      Da Ravena, di 14. Haver li campi esser a presso Brisegele, e consultano quid fiendum; item, di la expedition di Pyro da Cesena con 200 provisionati, va nel nostro campo.
     
      Da Rimano di 13 di Zorzi Franco. Di recever ducati 910 per far fanti, sotto Marco da Rimano e Antonazo da Viterbo. Item, li Bajoni esser zonti su quel di Rimano et diman sera sarà su la Concha. Fano mia 6 et non più al zorno; quel domino Paulo [41] da Fuligno dotor li guida; mancha uno dil Farnesio a zonzer con 40 homini d'arme; e Grifoneto Bajon vien tardo per caxon di la moglie amalata, et esso secretario li ha scrito solicitando. Et questi Bajoni haveano auto da la Signoria nostra ducati 6000. Manda la copia di la risposta dil signor di Rimano a lettere dil magnifico domino Joanne Bentivoy suo suocero, et a Polidoro di Tyberti da Cesena, zercha la retention di mastro Antiocho, contra el qual si formava el processo, e non ha manchato per lui sia seguito assa' mal et che abi amazato suo fradello et il secretario nostro, e compito il processo si vederà il tutto.