Da Ferrara di 14. Di le provision havìa fato il ducha per la recuperation di ducati 4000 nostri, fono presi che andava a Pisa, et gajardamente havìa scrito a Fiorenza non esser per suportar che sopra il suo sia facto danni ai messi di la Signoria. Et fiorentini risposeno dicti danari fono tolti sopra quel di Lucha, et lhoro non sapevano alcuna cossa.
     
      Da Pisa, in zifra di 11. Come el campo nimicho era a pe' di Santa Maria in Castello e non si move, ma stano per dar una paga a le zente, sì d'arme come fantarie; et che cercha 700 fanti nimici andoe a Sano dove era Zuam Grecho con balestrieri 50, nostro fidelissimo, el qual si difese virilmente, e parte rupeno, adeo tornono con vergogna in lhoro campo. Solicita la paga sia mandata per le zente, le qual vol al mexe ducati 20 milia; et che li nostri proveditori haveano tolto lì in Pisa ducati 2000 da più persone ad imprestedo, et con li ducati 4000 fono mandati da Lucha, che fono quasi intercepti, haveano quasi compito di dar la paga passata, computando certi orzi dati. Item, dil zonzer ivi di prè Ambrosio di Lucha governador di l'ospedal di San Pelegrin, dove fu asaltato Piero Rizo corier nostro insieme col compagno da alcuni dì e Barga Summacampagna, et li corieri visto inimici introno in chiesia e serò le porte et dete li danari che era in le bolze al preffato prete, el qual le tolse et ascose soto uno suolo in la stalla. Et venuti questi a zerchar non trovono nulla, nì le lettere, et preseno dicti corieri. Et il prete, poi partiti, tolse dicte bolze e le portò a Pietrasanta, et mandò a dir a Pisa mandaseno a tuor dicti danari che erano salvi.