[47] Vene l'orator di Monferà, domino Urbano d'Alba, alozato a San Zorzi Mazor, et è assa' mexi sta fermo qui, qual introduxe in collegio un corier franzese con lettere dil re a la Signoria, qual dimandava fusse lassato di prexon el signor Zuam Zernovich, qual era in Toresele, et nepote dil signor Constantino, qual il re lo voleva per suo homo. Et per el principe li fo risposto come si farìa con el consejo di X per il qual era stà retenuto, et si vederia, et poi a la regia majestà si responderia e a lui.
     
      Vene Piero Rizo, corier stato prexon con il compagno a Summa Colona e Barga, e poi conduto a Fiorenza. Disse come il morbo era a Barga o lì intorno, et come a Fiorenza erano malcontenti, et ora sta portà per uno comissario lhoro 20 milia ducati in campo, et havìa posto uno balzeto, harebeno 300 milia fiorini, di li qual ne era stà scosso da 60 fin 70 milia. Item, che Paulo Vitelli ha mal franzoso assai. Et che erano diliberati per haver ditto, erano balestrieri dil signor don Ferante; naroe il modo di li ducati 4000, che varentoe; fo laudato dal principe con tutto il collegio, et promesso farli etc.
     
      Di campo, di proveditori di 13 et 14 molto longe. Zercha li consulti fati, et haver restituito il tolto a la madona di Forlì, et haverli mandà a dimandar il passo e vituarie, perché non potevano haver, et era solum 5 mia ditto nostro campo lontan da Forlì. La qual madona li havìa risposo non haverne, et conveniva ajutar et dar a' fiorentini per esser il signor suo fiol al lhoro soldo.