In questo consejo, fo posto per li savii di dir al conte di Pitiano governador zeneral nostro, qual non si ha contentado di la diliberation fatta, che dapoi questo anno habbi ducati 50 milia a l'anno, et atento che habbi dicto, voler tuor con lui el conte Zuam Francesco di Gambara et darli tanta conduta et più di quello ha con la Signoria, ch'è 50 homini d'arme; damò semo contenti de' dicti 50 homini d'arme pagarli a soa excellentia a conto dil suo stipendio. Et disputato la materia, fo preso di dirli cussì il zorno seguente.
     
      Item, fo preso di scriver a l'orator nostro a Roma, sier Hironimo Donado el dotor, molti avixi acciò comunichi col pontifice di la partita de li oratori fiorentini re infecta, et che presto speravemo si slargessemo con soa beatitudine di le cosse si trata in Franza. Et, per aricordo di sier Marco Antonio Morexini cavalier consejer, fo azonto di darli etiam aviso come haveamo tolto a gratia el marchexe di Mantoa.
     
      [1498 10 22]A dì 22 octubrio. In colegio vene l'orator di Urbin, non disse perhò cosse da conto, solum dil bon voller dil suo signor.
     
      Vene el conte di Pitiano, qual per el principe li fo dicto la diliberation dil senato, et esso conte non rimase satisfato pregando si vedesse de jure se era ubligato a servir questo terzo anno la Signoria nostra, che era quello di rispeto; concludendo volleva questo anno ducati 50 milia a l'anno, et non star aspetar uno anno, e poi li comenza il tempo. Et si partì pregando pur si dovesse far veder di jure.
     
      Vene do oratori pisani, zoè quelli Piero di San Cassano et Janozo Lanferduzi, qualli dimandono licentia di partirsi per andar a trovar il marchexe di Mantoa et veder con quello di la via havia a far, solicitando il socorso a Pisa, et che resteria qui il terzo suo collega Lucha di Lanti.