Vene domino Antonio di Pii condutier nostro et Zuam Michiel Badelo da Mantoa, qualli erano stà mandati per il marchexe di Mantoa incogniti a veder le vie di andar a Pisa et li passi di Berga, et concluseno esser cativi passi, et impossibele a passar con zente d'arme per la val di Serchio, sì per esser streta e convegnir expugnar, qual per esser inverno el saria malissimo il modo di aver vituarie.
     
      Vene do messi, venuti di Franza per nome dil re per andar a tuor falconi, et li fo dato lettere et [70] quello rechieseno acciò soa majestà fusse servita, et dicti partino e andono al so viazo.
     
      Et hessendo da poi disnar chiamà pregadi, vene lettere:
     
      Di Mantoa duplicate di sier Nicolò Foscarini. Per una, come el signor havia ditto non voler cavalchar si 'l non havea il titolo, ma aspetava, cussì quando li fusse promesso, do over tre mexi ad haverlo. Per l'altra, dil ricever de li ducati 5000 restava haver il marchexe; et che el signor Zuane di Gonzaga volea pur alozamento sul nostro, et che la massa si faria in veronese a Corezo et passerano Po a Ostìa e San Beneto e in uno altro loco, ma prima vol saper dil titolo, et zà la diliberation nostra dia esser zonta.
     
      Di sier Zuam Paulo Gradenigo vene una lettera data a Mantoa a dì 23. Nara il zonzer suo lì, a dì 21, et il successo, qual per esser cosse scrite per el proveditor non fo leta la dita lettera.
     
      Di Rimano dil secretario nostro, di 25. Come in quella note era nato uno fiol a la signora ch'è fiola di domino Johanne Bentivoy, ch'è zà 100 anni la caxa di Malatesti non havea hauto fioli legiptimi che havesse dominato Rimano, et che il signor era fuora, et per la terra si facea gran alegreza.