Da Brexa, Bergamo et Vicenza lettere. Ma nulla di conto. Et vene uno messo di la comunità di Bassam, dolendosi non poteva far come Cologna, et il principe persuase a far, etc.
     
      De poi disnar, fo pregadi, et chiamato el consejo di X con la zonta di danari. Erano capi sier Baldisera Trivixam, sier Francesco Mocenigo et sier Piero Balbi, et quelli di zonta fono questi sier Marin Venier, sier Antonio Grimani procurator, sier Antonino Valier, sier Zuam Pixani, sier Polo da Mulla, sier Piero Loredam et sier Michiel Foscari, et li procuratori et il colegio, zoè savii grandi e di terra ferma, steteno poco: è da creder facessemo qualche ubligation de li depositi etc. Fono fati, etiam cai dil consejo di X, per il mexe di novembrio, sier Cosma Pasqualigo, sier Beneto da cha Pexaro et sier Piero Balbi.
     
      Di Mantoa vene lettere di sier Nicolò Foscarini, di 29. Come el signor li havia dito feva meter in hordine le zente sue sora Po, et scrito a le nostre andasse a Hostìa perché fosseno in hordine a passar Po, e mostreria di passar per Graffignana, maxime habendo habuto l'ordine zà di vegnir in Romagna, et che ha auto il passo dil ducha di Ferara, qual perhò voria saperlo do zorni avanti, etc.
     
      Da Roverè, di sier Nicolò da cha da Pexaro podestà. Dil zonzer lì di certi schiopetieri alemani, vano dal marchexe a Mantoa, venuti nonostante l'edito dil re. Et che a Trento si facea repari per dubito de' nostri; et esser nove, turchi daniza alcuni lochi di l'imperador, et esser soa majestà chiuso contra il re di Franza in una vale: tamen non era il vero.