Et come el signor Fabricio Colona era acordato con Milan, e più presto si pol dir col cardinal Ascanio, tamen non fu vero: solicita la venuta dil successor, et lì a Porto era stà ben tratato, qual è loco dil reverendissimo cardinal Michiel.
     
      Di Napoli di Lunardo Anselmi consolo nostro, doe lettere, qual non fu lete. Il re solicitava la venuta dil nostro orator acciò tutti intenda la bona amicitia ha la nostra Signoria con soa majestà: vol andar in Apruzo per non esserli stato, e le do raine vol pur andar in Spagna questo mexe per quanto dicono. Nulla altro da conto.
     
      In questo zorno si reduse il collegio, principe, Signoria et tutti li savii, per aldir li ambasadori di Candia, zà molti mexi in questa terra, zoè sier Venier Dandolo qual portava barba, per nome di nobeli, et sier Andrea da Porto per i populari: et parloe el Porto sapientissimamente, dimandando la anulation di una parte presa dil 1488 in pregadi, zercha non poder andar nave forestiere lì in l'ixolla a cargar vini, se non con dacio di ducati 4 per bota, la qual era tutta la ruina di quella povera isola. El disse molte raxon, el fu longo, et fo rimesso uno altro zorno ad aldir il Dandolo e poi consejarla.
     
     
      Queste sono le zente d'arme havia in questo anno 1498 la illustrissima Signoria di Venecia.
     
      A l'impresa di Pisa
     
      Domino Marcho da Martinengo governador cavali 400
      Signor don Ferante fiol dil ducha di Ferara " 400
      Domino Zuam Diedo " 100
      Domino Jacomo Savorgnano " 100
      Domino Hannibal de Doza " 100
      Domino Zuam da la Riva " 80
      Domino Lazarin da Rimano " 80