Rigo Porro " 32
      Zuam Picenim da Napoli, sta a Ravena. " 32
      Zuam Antonio di Luppi " 32
      Domino Anzolo Francesco da Santo Anzolo " 100
      Domino Antonio di Pii, sul Polesene . " 160
      Domino Ascanio e Jacomo di l'Anguilara " 100
      Sig. Francesco Beraldo " 80
     
      Summarum summa cavali 12123, sono homini d'arme ...
     
      Del mexe di novembrio 1498.
     
      [1498 11 01]A dì primo, el zorno di Ognisanti, justa il consueto, el principe fo in chiesia di San Marcho con l'orator di Napoli, di Milan, di Ferara et di Rimano; non fo quello di Mantoa, Urbino et Monferà perché non se ciedevano l'uno a l'altro, et non fono chiamati per non difinir li lhoro gradi. Nì etiam fo quel di Pisa. Fo assa' patricii, et molti vestiti di seda, et questo acciò tutti vedessero siben erano in guerra da più bande, la Signoria era ben et honorifice accompagnata; et poi udito messa si redusse la Signoria con il collegio: non fu il principe.
     
      Vene Zuam Alberto, e mostrò lettere dil suo signor di 30; con la copia di una scritali per il ducha de Milan, qual era a Pavia, a esso suo signor: come voleva far ogni cossa et esser fiol di la Signoria nostra, et voria che 'l prefato suo signor andasse a Pavia a parlarli dove sariano li ambasadori fiorentini.
     
      Da Mantoa, di sier Nicolò Foscarini, date a dì 30. Come solicitava el signor a cavalchar; qual rispondea voler aspetar risposta da la Signoria nostra, et tuto sarà in hordine e subito cavalcherà, et havia recevuta la nostra lettera ma non quella persuasiva etc. Et che havia inteso el ducha di Milan li prometeva ducati 70 milia a l'anno, titoli grandi et maridar suo fiol primogenito in la fiola dil prefato marchexe: et che il signor havia fato a saper queste promesse fateli a esso nostro proveditor, qual rispose saviamente dicendo non era da manchar per queste promesse di servir la Signoria; et che era messo suso, et si crede non farà fruto.