Di Zenoa di Marco Bevazam secretario, di 27 et 28 octubrio. Il ducha solicitava zenoesi che, mostrando venisse da lhoro, dovesseno divedar le vituarie vano de lì a Pisa per mar et di la Riviera; et che 'l comissario dil ducha et orator fiorentino molto questo solicitaveno; et che li otto signori antiani haveano risposto non voler, ma lui ducha dovesse far editi come lhoro signor; et che quelli daria contraria parte di Adorni che regna, desiderava che zenoesi si inimichasseno con la Signoria per esser in lhoro proposito; et che zenoesi erano fati richi per la guerra di Pisa. Item, come pol far una compreda di formenti per Pisa piacendo a la Signoria; e che quel domino Theodoro di Fornari è tutto nostro, qual ne dava li biscoti si mandava a Pisa, et li era fato lettere di cambio de qui; mandava lettere di Spagna. Item, come il corier, portò le lettere di 15, fo retenuto e conduto dal ducha a Pavia. Item, per la lettera di 28, come domino Zuam Adorno fradello dil governador havia 75 homini d'arme, [94] de li qual 25 è per conto dil re di Napoli et 50 per Milan, et el ducha li havia scripto dovesse star preparato e in hordine per cavalchar a li bisogni.
     
      Di Saragosa di sier Zuam Badoer dotor orator nostro, andava in Spagna, data a dì 20 octubrio. Era zonto a Barzelona, et a dì 8 partì di Zenoa con la nave Justiniana, have prospera navigation, e zonto propinquo a Barzelona li saltò fortuna, et convene andar in porto a Rosas, dove dismontò et andò per terra mia 100 fino a Barzelona, dove comprarà le mulle et anderà fin 6 zorni a la corte, ma volea ivi aspetar sier Domenego Trivixam orator nostro, qual havia inteso ritornava per terra.