Et per il colegio li fo risposto che oltra li fanti, provisionati, guastatori e schiopetieri, aviati in Romagna, etiam con bel modo mandi li ducati 9500, che ha il pagador de lì de la Signoria nostra, per corier a Verona; et dovesse mandar sier Zuam Paulo Gradenigo in Romagna, perché horamai eramo certi quel signor esser con Milan acordato. Et fo scrito a Ravena tenisse 1000 provisionati, el resto mandasse in campo in Casentino.
     
      Da Milan di l'orator, di primo. La nuova venuta lì di l'aquisto di Bibiena e Popi e Castel San Nicolò. Milanesi sono rimasti confusi; il ducha è a Pavia, parte doman per aqua e va a Parma et Cremona, et altro non vi esser da scriver.
     
      Da Ferara dil vicedomino di 3 a hore 24. Come risonava l'acordo dil marchexe di Mantoa con Milan, e quel ducha di Ferara era participe; va a Tresenta mia 10 di sora Figaruol, sichè si muta come fa il zenero, etc.
      Et inteso questo, acciò il Polesene non fusse senza custodia, fo scrito al conte Alvise Avogaro dovesse ivi andar con la compagnia.
     
      Da Verona e Bergamo. Lettere zercha la expedition di provisionati. Item che tutte le terre mandoe, manchava quelli 200 di Asola, qual erano renitenti a farli; pur mandoe 100.
     
      Dal capitano di le galie nostre di Fiandra, sier Jacomo Capelo, vene lettere date in galia in porto di Carthagenia, a dì 24 setembrio. Come a dì 16, navegando sora Tavolao su l'isola di Sardegna, si scontrò in 6 barze amiche, una englese, una di Maioricha do bischaine et do siciliane; fato segno di guerra le do fuzite et le nostre do galie, zoè esso capitano et l'altra patron sier Piero Bragadin fo di sier Hironimo, cadaun investì una barza, la qual mandoe a fondi, scapolò li homeni.