Nel bastion di Val di Serchio voleva [104] lassar Marchuzo Salviati contestabele fiorentino e Sanbrandan contestabile luchese, per haver più comodità di vituarie, con zercha fanti 300; in dito bastion facevano portar tinazi e bote assai da la vale per impirle di vino. Item, sier Piero Duodo havia pur febre intensa e fastidiosa; sier Domenego Malipiero da do zorni in qua non havia più febre, et quel zorno era levato suso, et che li tre quarti di la terra e dil campo era amalati ma pocho morivano. Havia fato retegnir el dito Zuam da Siena; sperava contracambiarlo con certi citadini pisani qualli erano in le stinche di Fiorenza.
     
      [1498 11 07]A dì 7 novembrio in colegio nulla da conto. Vene lettere di Sibinico di sier Arseni Diedo conte, et di sier Marin Moro conte a Spalato, come quelli citadini pregava la Signoria dovesse poner in la comission di l'orator nostro, si mandava al Turcho: il dolersi di certe anime menate via noviter da' turchi a' lhoro circumvicini, et veder di rehaver quelle.
     
      Da poi disnar fo consejo di X, per esser il zorno lhoro ordinario.
     
      [1498 11 08]A dì 8 ditto, vene domino Urbam orator di Monferà, qual expose certe cosse secrete. Tutti fo mandati fuora licet non vi fusse li cai dil consejo di X; credo sia avisi di Franza.
     
      Vene sier Francesco Zigogna venuto rector e provedador di Cataro, et referì sapientissimamente primo il sito di Cataro qual è ingolfado 18 mia in mezo di la Bossina e Servia; el castello forte mal custodito: vi è castelam sier Andrea Capelo, va per tutto a ducati 7 al mexe solamente: l'opinion sua saria non ussisse di castello, et havesse ducati 10 al mexe, e fusse azonto qualche paga di più, et che a li fanti di la terra quali custodize le mure li avanza molte page.