Item, merchadantie in Mantoa ogni anno per ducati 300 milia; li promete maritar la soa primogenita in suo fiol conte di Pavia; li dà di conduta 300 homini d'arme et 200 cavali lizieri, e al signor cavalier domino Enea Cavriana suo favorito 100 cavali lizieri, et dà a esso marchexe stado, che li dà de intrada a l'anno per ducati 10 milia, in parmesana, et altri capitoli conclusi con domino Marchexin Stanga et uno secretario dil ducha di Ferara, el qual ducha in tuto si ha interposto di questi acordi.
     
      Da Ravena di 6. Come quelli citadini non voriano tante zente d'arme quante vi manda la Signoria, per non haver alozamenti, basta 50 homini d'arme apresso quelli dil Vallaresso et Meleagro da Forlì. Item, esser nova come domino Zuam Bentivoy veniva con 100 homini d'arme per nome dil ducha di Milan a quelli confini contra di nui, tamen di questo da Bologna nulla si havea; haver di Rimano dil secretario, nostri voler lanze da fanti, sachi etc.
     
      In questa matina sier Lunardo Grimani, provedador sora l'arsenal, referì in colegio la condizion dil nostro arsenal et di galie sotil numero 53 che sarano in hordine, et di le galie di viazi grosse et la nave armeral si conza a Poveja, et il bisogno havia la caxa di sartie e di canevi li qual si haveva per via di Bologna, di ferro, di legnami, etc. Et fo comesso per colegio dovesse comprar quello era bisogno, acciò si potesse haver galie preste; et comesso a li patroni a l'arsenal, qualli erano sier Lorenzo Contarini, sier Piero Moro et sier Alvixe di Garzoni, usasseno ogni diligentia a farle compir.