Item, esser tornato il messo mandoe a Sonzin con lettere dil ducha a domino Francesco Bernardin Visconte, et referisse haver fato comandamento et suspeso l'opera.
     
      Da Brexa, di rectori. Manda le mostre fate di le zente de lì; et una lettera abuta dil signor Zuane di Gonzaga fradello dil marchexe di Mantoa, advisava voler esser con la Signoria sempre, non ostante el signor suo non fusse etc., venendo a star de lì con la moglie e voleva seguir la conduta.
     
      Di Aste, dil secretario, di 11. De' coloquii abuti con missier Zuam Jacomo di Triulzi: dice el marchexe di Mantoa ha roto la fede et lui esser fidel. Ben voria da la Signoria nostra li ducati 2000 per il piato di la contessa sua moglie. È da saper esso missier Zuam Jacomo è conto di Mixocho, et vol esser capitano zeneral nostro con uno capitolo havia Bortolomeo Cojom, el qual disse, non desnuò spada in servicio di la Signoria nostra hessendo capetanio. Quanto a Como, disse le cosse esser zà concluse in Franza. Ben voria la Signoria li desse di qua di Ada qualche locho, e non fazi apontamento con Milan se non li dà li soi castelli et ducati 4000 havia in reame de intrada; et era in zifra.
     
      Da Ferara, di 13. Dil zonzer lì di le nostre zente d'arme et sier Zuam Paulo Gradenigo, qual subito si parte per Ravena. Manda lettere vien di Pisa, le qual zonse hessendo reduto pregadi.
     
      Da Pisa, de li proveditori, di 7. Dimandano danari per le page le qual compì a dì 4. Et inimici in quel zorno a dì 6 a hore 17 si levò di Santa Maria in Castello, havendo fornito el bastion di la Verità di fanti, e andono a Lucha, diman a Pescia poi a Fiorenza; et come el governador, e sier Vincenzo Valier pagador nostro, con zente li andono driedo, per farli danno.