Item, come dovesseno aricordar a soa majestà, il ducha di Milan, il re di romani e fiorentini farano muover il Turcho contra di nui; perhò voriano rechiedesse a soa majestà in questo caso che quella dovesse dar auxilio a' nostri contra esso Turcho, et volevamo alcun capitolo zercha questo particular.
     
      Item, che in queste pratiche aliquando dovesseno esser lhoro soli con la majestà dil re, et debino usar quelli amici a lhoro parerano possino juvar in la materia: né era opinion dovesseno concluder, si ben el re non volesse meter il capitolo dil Turco, et che li 4000 fanti fusseno sguizari. Item, alcuni savii, che quanto a li confini, non potendo haver li passi di là di Ada, dovesse concluder, et havendoli, darli 70 fin 100 milia ducati; altri volse che havendo li dicti passi di là di Ada li prometesseno ducati 100 milia et più, ma non li havendo non se dovesse dar. Item, altri che vedendo il ducha di Milan fusse per adatarse, omnino dovesseno concluder. Fo gran disputatione, parloe questi: sier Nicolò Trivixam savio dil consejo, sier Marco Antonio Morexini cavalier consejer, sier Polo Barbo savio dil consejo, et per esser l'hora tarda fo remesso a venir doman a questo consejo, et comandato gran [125] credenze. Et è da saper che in la opinion dil forzo di savii era di haver o Cassam e Lodi, Trezo et Lecho che sono sopra le rive di Ada di là, o almeno qualcheuno di lhoro, aliter li ponti si dovesseno ruinar, et non potendo haver se non di qua di Ada, concludi con li danari; queste erano gran materie, et fu fato far assa' oratione.