Quali mandono a dir esser atachati con inimici, et che venisse avanti, e subito corendo a tuta furia con tuti li stratioti, lasoe a driedo domino Piero Gambacurta con i balestrieri per non poter tenirli driedo. Zonseno nostri di là da Lucha a la volta de Lonata, mia zercha 7, dove catono li primi nostri, quali li disseno che inimici con tuto il campo haveano fato alto a Lonata et svalisono zercha fanti 60 de driedo guardia, che erano rimasti a driedo, e balestrieri 10, et mulli 28, chariazi, e fato presoni 4 di taglia, tra i qualli siamo [135] certifichati per luchesi e pisani che ve era un fiol di Zuliam Gondi comisario de' fiorentini, quale insieme con uno altro prexone non si trovava, ma erano stà strafurati per stratioti, tamen era preso Marco Fantoni citadin fiorentino et uno altro forestier; et che se con lui haveva li altri cavali lizieri nostri, era certo a la so retroguardia li hariano fato danno e vergogna, perché erano mal in hordine, amalati e mal contenti, e li fanti hano auto pochi danari, che non passavano numero 1800. Et come a dì 9 intendendo era in Serchio per fortuna un bregantin de un corsaro nemicho nostro, esso pagador cavalchoe con parte di cavali lizieri et domino Jacomo di Tarsia capitano di le fantarie a la bocha del ditto fiume per prenderlo, ma si partì et nulla feno. Et come quella matina a dì 10 una hora avanti zorno, et signor don Ferante con la sua compagnia et domino Filippo Albanese, el governador domino Marcho dal Martinengo et el capitano di le fantarie con cercha fanti 500 cavalchono et feno condur con lhoro uno cortaldo, uno passavolante mezano e do falconeti; et esso pagador si avvioe inanti con li stratioti e ne mandò parte a la volta di la Caprana et di Sicho per far sempre la scorta, el resto feze star su la strada che vien da la Doloroxa a Calzi; et gionto al castello, li fo fato intender per el trombeta che si volesseno render over anderiano per el fil di spada.