Or nostri messeno dentro zercha fanti 100 soto do contestabeli, et per opinion sua voria andar a larecuperation di Librafata, che saria impresa da expedir in do over tre zorni, utele et di honor, sì per segurar el val di Serchio come per haver la strada maistra di Lombardia et si reputa una chiave di Pisa, et voria lassar el Bastion et ogni altra impresa; et saria più fazile perché inimici, el Bastion di Montemazor che nostri feno, lo haveano abandonato; et etiam come quella note la signoria di Pisa hebbe aviso che 12 homini d'arme dil ducha de Milan, che andavano in campo de' nimici, erano alozati a Mazacroxe, et fatoli questo intender sier Domenego Malipiero proveditor, esso pagador mandoe Francho dal Borgo e Lactantio di Bergamo capo di balestrieri, Gregoliza di Mitriclada e Franzi e Zuam Zafa capi de' stratioti, con zercha cavali 100 a la volta sua. Quale inteseno che eri sera domino Nicolò Tegrimi citadino luchese et affictionato dil ducha de Milan, quale va orator de lì, zonto nel ditto loco li feze partir e zonseno in Lucha a hore 8 di note, et andando essi nostri, non havendo potuto far nulla, svalisono do poste da zercha fanti 60 luchesi. Item, come sier Piero Duodo havia la febre, stava in leto, et sier Domenego Malipiero stava assa' bene ma non ussiva di caxa. Item, esser nove de lì, Paulo Viteli vegnir a la volta de Casentino, et cavali 1000 con Vitelozo suo fratello mandavano a quelle frontiere di Vico e Pontadera, tamen nulla di certo di questo haveano.
     
      Da Cataro di sier Francesco Querini rector e proveditor nostro, do lettere di 25 octubrio.