Una molto copiosa di le cosse de lì, et di la custodia et provision bisogna. Per l'altra, come era venuto il subslacho che governa Montenegro, che fo dil Zernovich, a Zuppa con 300 persone per far manzarie; si à mandà a offerir a esso proveditor et, presentarlo, et di converso li havea mandato certi presenti. Item, Ferisbei sanzacho di Scutari si ritrovava esser zornate cinque di Cataro, qual si aspetava a Scutari.
     
      Da Constantinopoli di sier A. Griti, date a dì 25 septembrio, drizate a Zacharia di Freschi secretario nostro. Avisa molte cosse. Et come il Signor turcho oltra le 40 velle facea armar altre 60, et certissimo ussiria. Item, che Mustafà bei era venuto lì per otegnir licentia da la Porta di passar in Puja. El [137] qual è quel bassà che fu a Otranto, etc. Item, esser stà fato una coraria per turchi verso Polana, e sono turchi 70 milia. Item, come a dì 20 zonse uno orator dil re di Hungaria per notifichar non esser in acordo col re di Polona suo fradello. Item, esser venuto lì uno messo di Ferisbei sanzacho di Scutari, tamen nulla ha ditto de li confini, et come Sanzach bei era molto amico di la Signoria nostra.
     
      In questo consejo di pregadi, licet, fusse chiamato per intrar in la materia di Franza, tamen, leto le lettere, introe el principe, Signoria, con li savii et cai dil consejo di X, et era homini 24. Licenzioe el pregadi, comandando credenza al solito, se divulgoe li nostri oratori in Franza tra lhoro non esser d'acordo.
     
      [1498 11 20]A dì 20 novembrio in colegio vene Zuam Alberto da la Pigna tornato di Ferara, qual disse per nome dil suo signor, si doleva quello havia fato il marchexe di Mantoa et che non a consejà in niuna cossa; et come ivi era venuto uno orator fiorentino incognito, et li havia parlato, et il signor dittoli il tutto et havia scrito a Fiorenza.