Di sier Andrea Loredam, capitano di le nave, date a dì 18 sora Ruigno. Come era zonto lì con le nave, justa i mandati, per haver acompagnà le galie Baruto, Alexandria e trafego in Golfo. A dì 28 octubrio tutte fono a Modon, dove è restato la barza patrom sier Daniel Pasqualigo. Avisa come la nave di sier Andrea Badoer, veniva di Candia con vini, patrom Piero da Cataro, esser sta da uno corsaro portogalese, fo qui con zuchari di Medina, presa sora il Sasno, et inteso esso capitano questo, lo volse seguir, ma era zà partito et non l'arìa mai zonto; et come velizando con la barza fo di Gambacurta che prese, quella note la urtoe in la sua nave et fè aqua, scapolò li homini et si rupe; etiam una altra nave [139] presa di uno corsaro si rupe. Item, dimanda quello habi a far, et aspeterà mandato.
      Questa matina in colegio, perché le cosse di l'armata dil Turcho reussiva, fo alditi li provedadori sora l'arsenal: parloe sier Lunardo Grimani et in opposito sier Antonio Trum, et per tutto il colegio io Marin Sanudo savio a li ordeni fui mandato a Lio a far la mostra di certi cavali de' stratioti venuti qui per haver stipendio da la Signoria nostra, et menai con mi Piero di Paxe rasonato et cussì andai; non fu in hordine, et tornai a hora di pregadi.
     
      In questo consejo fu leto certe lettere particular di le cosse di Franza, et comandato gran credenze et haec satis.
     
      Ancora fo posto, per tutti i savii dil colegio et l'ordine nostro, la comissiom a sier Andrea Zanchani, orator nostro andava al Turcho, come debi basar la man al Signor e li dagi la lettera bolata di bolla d'oro, et exponi la sua comisiom brieve; debbi visitar li bassà: el primo è Imbrai bassà, el segondo Charzego fo fradelo dil ducha Ulacho et è zentilomo nostro, el terzo Aliagu è bassà. Item, Mustafà bei fato bilarbei di la Grecia.