Et voglii la renovation di capitoli di la paxe con quelli medemi capitoli, et volendo altri capitoli scriva. Item si sarà fato interogation di le cosse de Italia, responda le guerre esser processe per caxon di Pisa, cargando Milan, fiorentini, re di romani et altri, et li avisa le cosse con Franza. Item, di quel Zuam da Constantinopoli almodar ch'era qui in prexon, per il qual se li mandava ducati 1400, et lui sta mal. Item, che potendo rehaver Zupa, etc., se li dagi ducati 3000 pro nunc. Item, rechieda li danni fati per turchi, over macharossi a Spalato, Traù e Sibinicho. Item, procuri di far ritornar el nostro baylo potendo, et otegni editi li sanzachi fazi ben confinar con i nostri luogi. Item, di la balotation di sier Homo Griti, et scusa la Signoria si qualche uno di soi carazari zoè dacieri vien in le terre nostre, perché non li cognoscemo. Item, dagi li ducati 600 averà a cambio da sier Pantaleo Coresi over sier Andrea Griti, che si suol dar di mazo per caxon dil Zante. Item, potendo haver la Zefalonia, spendi ducati 3000. Or fo qualche disputation; chi aricordava uno capitolo e chi l'altro, et ave tuto il consiglio, 20 di no; et qui soto noterò la copia di la lettera fo scrita al Signor turcho.
     
      [140]Copia di la lettera di credenza mandata
      per la Signoria nostra al Signor turco.
     
      Mandamo al conspeto di la vostra excelentia el nobel homo et da nui ben amado citadin et solenne orator nostro Andrea Zanchani, presente lator, per visitar la excelentia vostra come se convien a la bona pace et amor è tra nui, et per dechiarir el bon animo et mente nostra verso de quella, la qual pregamo che voglii prestar ampla fede in tuto quello che 'l ditto nostro orator dirà per nostro nome, che tuto sarà a stabilimento del bon amor et pace nostra, la qual sicome è ferma dal canto nostro, cussì teniamo sia certissimamente dal canto di la excelentia vostra, i anni di la qual siano molti.