Avisa esser stato a Rezo in Calavria, el qual si tien per il re di Spagna, con el Ziglio, Tropia, la Mantia et Cotrom, di le qual esso re havia di spesa ducati 13 milia. Il marchexe di Cotrom era a la Rozella. Item, come lì a Messina era venuto in galia a trovarlo el principe di Rosano, di età di anni 38, stato anni 33 (sic) in prexon a Napoli, qual ha ducati 30 al mexe di provision li dà il re di Spagna. Item, come esso capitano soliciterà il suo viazo; et di certi corsari si dice esser de lì via, ma non perhò da farne conto: la qual lettera fo leta in colegio e non in pregadi.
     
      Fo leto una poliza di l'armirajo nostro dil porto mandata al principe. Avisa di molte nave esser in Hystria, zoè Marco Antonio Novelo vien da Constantinopoli che è sora porto, una nave di Piero Coresi vien ut supra, una di sier Stephano Contarini carga di sal; et narra le altre nave che vien. Item, le galie di Alexandria e trafego state a Modon non fu lassate intrar per dubito di morbo, licet el capitano di una et altra muda zurasse non esser apestadi, tamen non introno.
     
      Fo intrato in la materia di scriver in Franza. Era 4 opinioni: una voleva li oratori dimandasse di là e di qua di Ada et senza darli algum danar concludi havendo le rive di qua di Adda; l'altra opinion dovesseno far experientia di haver di qua e di là di Ada con darli 100 milia ducati, et non volendo concludi di qua di Ada et darli li 100 milia ducati, sichè ad ogni modo concluda senza rescriver; l'altra voleva per haver le rive di là e di qua di Ada, li dagi ducati 100 milia, aliter non concluda et [144] rescriva, et che li dassemo ducati 10 milia per mexi 6 al mexe per pagar i sguizari; la quarta opinion era che si dovesse star su la prima parte che era stà presa l'altro zorno et non scriver altro.