Fo etiam posto do opinion zercha il capitolo dil Turcho. Or fo disputato, et parloe in questo zorno tutti questi: sier Alvixe da Molin savio a terra ferma, sier Piero Vituri, sier Domenego Pixani da Santa Marina, ma non parloe per esser andà la parte, sier Marco Antonio Morexini cavalier consejer, sier Antonio Trun. El serenissimo principe nostro, qual non era di opinion di far liga con francesi, dete bota a chi era stato causa di tuor l'impresa di Pisa, laudò il far justicia, chiamò nostro fradelo sier Domenego Morexini procurator, testemoniò che la liga trina fo causa di gran mal, zoè quella fo fata a Roma per sier Andrea Capello orator nostro, tra il papa, la Signoria nostra el ducha de Milan, di la qual non fo mai di opinion; et aricordoe questo che, rompendo il Turcho guerra, non si fosse ubligadi a romper a Milan. Poi parlò sier Polo Barbo, sier Lunardo Loredam procurator, sier Nicolò Trivixam savii dil consejo, sier Francesco Trum et ultimo sier Beneto Trivixam el cavalier, et fo mandate le parte et le quatro opinion, et era hore 5 di note e 'l zorno di Nostra Dona, et di largo fo presa la prima opiniom, zoè che dimandi di là e di qua di Ada, et senza darli danari concludi con le rive di qua di Ada, et hessendo dificultà de li danari, conza il resto di capitoli et rescriva tenendo la cossa in praticha. Et di questo fo comandato stretissima credenza con dar sagramento, perché alhora la cossa importava fino non fusse conclusa la liga.
     
      Ancora fo posto parte per tutti i savii di scriver a li oratori in Franza una sapientissima lettera admonitoria a star uniti, et non desseno causa di far dir di lhoro, e have tutto il consejo.