Inimici erano a Prato vechio, el signor di Piombin in Popi, el conte Ranuzo di Marzano a la pieve di San Stephano dubitando di Borgo San Sepulcro; et come el signor di Piombin li havea mandato a dir di parlarli, come per lettere di nostri proveditori zà eramo avisati. Poi vene dentro Piero di Bibiena et parloe zercha questo.
     
      Da Ravena di 20. Zercha li elemani insolenti che lo fa disperar. Et haver fato la mostra di 500 provisionati di brexana ben in hordine, zoè 300 di Brexa, 100 di Salò et 100 di Asola; et mandoe una lettera di Marco di Santi da Rimano, come le artilarie erano a Petrabotola; et zercha il condur di quelle scrisse assa' cosse.
     
      Da Rimano dil secretario, di 19. Come el zorno avanti, a dì 18, el signor havea fato batizar suo fiol e impostoli nome Sigismondo, et fono compari li oratori dil cardinal San Zorzi, dil signor ducha di Urbin e dil signor di Pexaro, et el vescovo di Forlì, che vene in persona, et esso signor di Rimano in queste celebration di baptesimo honoroe molto il secretario nostro.
     
      Da Pisa di 12 et 14. Come li provedadori erano amalati. Et che havendo danari da dar a le zente anderiano a recuperar alcuni castelli. Et uno Francho dal Borgo contestabile di fiorentini solicitava volersi acordar con la Signoria nostra, hora che 'l suo campo era levato. Item, esser amalati 4 condutieri nostri, domino Zuam Diedo patricio nostro, qual era stato lì mexi 15 e habuto 4 infermità grande, e voria licentia di venir con la persona solla di qua a varir. Li altri condutieri amalati sono domino Jacomo Sovergnam, domino Hannibal da Doza et domino Zuam Da la Riva.