Che Fiorenza era in gran extremità; non pono scuoder danari, né non voleno impresonar per dubito di novità; non hano potuto dar la prestanza a Paulo Vitelli, et mandono per lui, Alfonso Strozi, Jacomo di Nerli et Juliam Gondi, et eri sera introe secretamente, et li 80 steteno sin 8 hore suso in consiglio. Item, mandano a scuoder per le ville, tuor li bestiami di citadini e venderli. Dicono mandar el conte Ranuzo a la volta di Pisa con le sue zente, et il ducha di Milan manda la compagnia di misier Zuane Bentivoy, la qual sarà in hordine fin 12 zorni. Tamen misier Alexandro suo fiol non ha potuto haver danari, et perhò aricorda il stringier, e far presto, perché non habino tempo di medicare la piaga, et quella cità esser come fu al tempo dil ducha di Calavria quando prese Colle Imperiale che convene el magnifico Lorenzo andar a Napoli; et che volendo far danari non ardiscano meter man su le persone, come ho dito di sopra, et che la terra aspeta il vegnir avanti. Et come il comissario di Castrocaro havia scrito lì a Ravena esser fato mostra di 6000 fanti, che ha dato che dir assai a la terra, e dicono el ducha d'Urbim non vol la Volpe per esser stà altre volte roto e preso, ben si ha paura dil signor Carlo Orsini et dil signor Bortolomeo d'Alviano; et che de lì si hebbe alegreza quando inteseno el dito Alviano esser stà ferito, et si have lettere da Milan con alegreza di questo; et se diceva la Signoria vorà tenere li lochi dil Casentino presi per non haver speso li soi danari invano, et la terra voria chiamar Piero, et si non dubitassero fusse vendicativo, si reduria al quia; et haver nova de lì da li comessarii è a Popi, che esso Piero li havea mandato a rechieder di parlarli.