Vene Piero di Bibiena et mostroe una lettera di Piero di Medici, di 21, data a Bibiena, di molte cosse, dannava el capo, etc.
     
      Da Ravena, di 26. Quello havia di l'impresa di Galiada et di sier Zuam Paulo Gradenigo. Etiam vene lettere di 25, date Sojano, come era ivi zonto, voleva andar in campo.
     
      Di campo, di proveditori, date adì 21 a Bibiena. Come era zonto le artilarie ma non li do canoni grandi, e zonti sarano volevano andar a campo a uno castello di là da Popi chiamato Alierna; et l'Alviano steva meglio, havia cavalchato cussì ferito; et che Morelo da Cortona condutier dil ducha di Urbim et Perim di Lupi contestabele nostro erano stati feriti a l'impresa di Camaldole; domino Astor Bajom li era caduto uno cavalo adosso et mal si potrà operar, et cussì l'altro Bajom havia una doja di fiancho, sichè questi do etc.; et il conte Ranuzo era intrato in Arezo e partito di Pratovechio; et Chiriacho dal Borgo eri sera introe in Pratovechio con 400 provisionati. Et a dì 17 sabato haveano nova Paulo Vitelli era intrato in Fiorenza: etiam altro scrisse. Drezate le lettere ai cai dil consejo di X, zercha il suo indusiar.
     
      In questa matina feci expedir la poliza di quello domandava sier Nicolò Pexaro, provedador di l'armada, et fo balotato.
     
      Da poi disnar fo consejo di X simplice, inter caetera fato li soi capi, sier Baldisera Trivixam, sier Marin Contarini e sier Francesco Mocenigo.
     
      [1498 11 29]A dì 29 novembrio in colegio. Vene don Hironimo Spagnol monaco in Santa Giustina di Padoa, qual fu alias rector di scolari, et expose dolendosi per nome de quelli monaci di una lettera di la Signoria nostra zercha il cavar sul Polesene contra i Papafava citadini di Padoa che li era in gran danno, et fo suspeso di la lettera.