Replicha quelle scrite di 27 octubrio. Et haver aviso a Tenedo esser 8 fuste di turchi andavano in corso, et esser zonte lì a Modon do nave venute da Constantinopoli, et nulla dice di l'armada facea far il Turco. Item, la galia di sier Marin Barbo soracomito et la Zaratina andò con le do galie in Alexandria per acompagnarle; le do Veniere et la Loredana mandoe de qui a disarmar; quella di sier Polo Nani et la Sibinzana mandava a Corfù per andar a Pisa con sier Simon Guoro, justa la deliberation nostra; et sier Zuam Francesco Baxadona lo mandava a condur sier Andrea Zanchani al Turcho. Item, haver di Rodi, di 26, da sier Alvise Malipiero consolo [165] nostro. Qual scriveva haver di Syo da Zuam di Tabia consolo, date a dì 24 septembrio da Pera: come a Constantinopoli si preparava armada per ussir a tempo nuovo e si chalafatava nave e galie. Item, haver per uno gripo che una barza armada non sapea de chi combateva sora il Sasno una nave la qual la prexe, et come esso proveditor si dovea partir per andar scorendo per smondolar i corsari. Et è da saper ditta nave era di sier Bernardo Barbarigo fo dil serenissimo, patron Lucha de Simon, e fu presa da una barza portogalese, la qual era stata qui carga di zucari di Medera e andava a Salonichi a cargar formenti, et in bocha di colfo la prese, li tolse ducati 1400 era in uno gropo velle, coriedi, etc., e lassò la nave con lo trincheto e pochi homeni, la qual vene a Corfù. Etiam dita barza prese quelle do nave sora Cao Malio Badoera, etc., come ho dito di sopra.