Item, esser stà fato et garbelato da [166] poi muda contra la leze, e voleva fusse provisto. Item, le galie haver incrosà le giave et messo con la nave rata colli 2127, et al Cajaro si tramò manzar ducati 24 milia a' franchi. Et esso consolo avisò sier Piero Lando capitano di le galie non venisse, tamen vene, pur non processe garbujo alcuno. Laudoe sier Francesco Bernardo suo predecessor, et che di la batalation di Assen Sembizuli merchadante moro a requisition di sier Alvise Arimondo et sier Piero Bernardo dete il danar, poi lo volse per forza, et per questo le galie tardò zorni tre, et per il consejo di 12 nulla fece per esser homo di poter e richo et ha il cargo di una galia lui sollo, et hessendo batalà, tuti mori veniva a esser, etc. Item, a dì 1.° di questo, la galia sotil soracomito sier Nicolò Marcello zonse a Damiata col presente dil soldam et l'ambasador veniva di Cypro. Item, di morbo si stava bene per hora; el cotimo era debitor ducati 10 milia. Quel paese esser in gran confusion con pocha justicia e gran manzarie. Mamaluchi ogni trato vol danari, né il soldam si havia ad altro messo cha manzar il paese. A li dì passati, el diodar era verso Damasco et il soldam li andò contra con exercito, rupelo e fugolo; si redusse verso Alepo; si crede il soldam questo inverno farà exercito per destruzerlo.
     
      Da Pisa. Vene lettere, hessendo pregadi suso, di proveditori, di 21. Come voriano danari per la paga la qual montava ducati 17 milia. Et mandoe una poliza di le zente d'arme, era homini d'arme balestrieri a cavalo 1310, stratioti 300, fantarie 9406, sichè montava, fato il conto, la paga ducati 16860; et per uno capitolo danava il capo: el qual non fu leto publice.