Di sier Vicenzo Valier pagador have lettere, di 21. Come quel zorno nostri ebbeno el bastiom di Stagno, che da inimici era fato assa' caso. Vene Vitelozo con zercha 400 cavali lizieri e fantarie et 100 homini d'arme a Vico e Bientena e Pontadera, con opinion di mandar i cavali lizieri per la volta di Ligorno per socorer el dito bastion per quella via, e li saria andà fato perché li stratioti non volseno star a quel passo come scrisse, né rimase salvo i greci con pochi cavali, et Vitelozo volse andar a la volta de Calzi e corer su le porte di Pisa per far divertir, ma nostri fono presti. Item, inimici haver ingrosato le guardie a Ligorno, e li dieno mandar fanti 200 e per le terre di Colina 100 et 50. Paulo Vitelo è pur a Fiorenza per voler danari, che mai hanno il modo de darli, et le sue zente si estendono verso Pessa et Fiorenza mal contente e con pochi [167] danari, sichè nostri, havendo danari et uno capo, si faria.
     
      Da Ferara dil vicedomino, di 30. Come de lì era uno Antonio Strozi, orator fiorentino, et si dicea zà 4 giorni la Signoria nostra esser acordà con Fiorenza et Milan e fato pace o trieva a prolongar, e Pisa restava in man dil ducha di Ferrara, et scrisse come erano B p r p (sic) etc. Conclusive, scrisse assai cosse che poi fu vere, tamen non era ateso imo calefato.
     
      Da Castel Delzi di sier Zuam Paulo Gradenigo data a dì 25. Come era zonto lì; andava in campo, et che a l'impresa di Sojano in Galiada era bisogno zente a piedi et no zente d'arme.
     
      In questo pregadi, referì sier Nicolò Foscarini, stato proveditor a Mantoa, quello prima in colegio referite, danando molto il marchese.