Fo laudato de more dal principe, etc. Et fu leto la scritura portata per Zuam Alberto di Ferara di quello prometeva far a la Signoria nostra zercha Pisa, sottoscrita Hercules dux Ferariae di sua mano, data a Ferara a dì 24 novembrio hore 4 di note; et altre scripture date per detto Zuam Alberto. Et per esser hore do di note, fo rimeso a luni.
     
      È da saper, in questa matina in colegio fo fati vegnir l'armiragio dil nostro porto, et quello di Chioza, et quello di Malamocho, sier Zorzi Dragon fo patrom di nave, sier Antonio di Stefani fo armirajo in armada con sier Antonio Grimani procurator, et altri, per intender la lhoro opinione per esser homini maritimi quello consigliavano fusse fatto, et per qual porto dovesse vegnir la barza grande era in Istria capetania; et consegliato per il porto di Chioza, fono quelli mandati a vederlo.
     
      [1498 12 02]A dì 2 decembrio in colegio. Vene sier Andrea Zanchani et tolse combiato per andar orator al Turcho, et usoe alcune parole et avisaria spesso dil tutto exequendo la sua comissione. Et li rispose el principe andasse in bona hora, etc. Et fu fato per colegio la comission a sier ... Guoro proveditor di l'armada che andasse per la Dalmatia a compir d'armar la sua galia et andar poi a Corfù, dove aspetti mandato nostro.
     
      Vene Zuam Alberto da la Pigna, solicitando la resolution, e che l'orator di Milan etiam solicitava, et li fo dito si faria. Et per la terra era fama di pace et per fiorentini in circulo si parlava.
     
      Vene Piero di Bibiena, secretario di Medici, et disse come in la lettera abuta, di 25, dal suo patrom in zifra, era certe parole, zoè che il confalonier di Fiorenza et Jacomo di Nerli havia mandato a dir [168] a Juliano di Medici come li mandasse do frati di observantia a parlarli per veder di conzar le cosse.