Avisa molte cosse, et come el confalonier di Fiorenza et Jacomo Nerli havia mandato a dirli li mandi doi frati, et cussì li havea mandati. Et che 'l signor Bortolo d'Alviano dicea, siben il ducha di Urbin non vol far, lui era disposto di far qualcossa, et perhò voria solo 1000 fanti soto di lui che faria gran fati.
     
      Da Traù, di sier Lorenzo Corer conte. Di certa incursion fata per turchi in quelli confini et menato via anime et animali, tamen il teritorio de la Signoria nostra non era stà tocho né fato danno.
     
      Et per collegio fu scrito a sier Andrea Loredan capitano di le nave, qual era sora porto, atento li porti non erano seguri a intrar, né quel di Chioza che bisognava cavar: che dovesse ritornar a Puola, et lì lassar la nave con alcuni homini a custodia, et lui dovesse vegnir in questa terra.
     
      È da saper questa matina dabasso vene nova assa' compassionevole, come ... la nave di sier Carlo Contarini fo di sier Batista carga di ... veniva ... hessendo in mar a la vella, se impiò fuogo et quella si brusoe et have danno ducati ...
     
      Da poi disnar, fo consejo di X, et li savii si reduseno in collegio a consultar la risposta si dovea far a Zuam Alberto.
     
      [1498 12 04]A dì 4 decembrio, fo santa Barbara. In collegio el principe cavò justa il consueto quelli di la balota d'oro; et rimase el quinto ch'è n.° 31 solamente, et sì pochi fu per la lege nuova.
     
      Vene sier Francesco Bernardo venuto consolo di Alexandria, qual havia una longa e gran barba, et riferite molto acomodatamente quelle cosse, et di l'angaria volea il soldam per haver danari, qual ancora regnava et suo barba fratello di la madre governa, e Cartabei signor di Damasco con tutta la Soria li have tolto l'ubidientia, et per non haver più danari, haver posto gran angarie al paese.