Vene sier Piero Lando venuto capitano di le galie di Alexandria, et fu brieve: narò il suo viazo et esser andato in Alexandria con la barza e do galie sotil; esser intrato nel Farion a dì 13 septembrio licet el consolo li scrivesse restasse sora Bichari, et haveano nostri abuto specie. El piper di soldam sporte 210 a ducati 80 justa il consueto. E roto il merchà, nostri volea pagar ducati 86, et altri ducati 81 fin 84, zenzari ducati 13, canele garofoli 80 e va discorendo, et era stà fati in uno zorno e una note avanti muda colli 1400. In tutto era colli 2125 su le galie, et 130 su la nave rata.
     
      El principe li laudoe tutti do capetanei; et chiamò nui savii ai ordeni cometendone si dovesse consejar quello dicea.
     
      Da Ravena di 2. Haver la madona di Forlì havia fato comandamento a uno homo per caxa di quel territorio fusseno in hordine, et debino star preparati, dubita per l'impresa di Galiada.
     
      Da Rimano dil secretario, di primo. Haver nova per uno venuto di campo, sta con Marco da Rimano, qual sta malissimo, nostri haver hauto Camaldole amazati tutti quelli erano dentro; et che a dì 27 quelli di Prato Vechio si reseno a li proveditori, tamen non era il vero. Item, el signor di Rimano esser sdegnato la Signoria fazi cavalchar il conte Lamberto Malatesta di Sojano suo inimico, et voria lui cavalchar, et li havea dato do page, et aspetava risposta del conte Federico dil Monte di quel suo castello vol donar a la Signoria nostra.
     
      [173] Qual è da saper, in questi giorni seguite certo scandalo contra ditto conte, perhò che dal fiol, con ajuto di la duchessa de Urbin, fue privo di certo castello come scriverò di soto.