Di Candia. Vene lettere, qual non fu lete per esser vechie et di pocha importantia; et etiam di Cypro, di 26 octubrio, zercha molte materie di quello acadeva de lì, qual etiam, no fo lete.
     
      Da poi disnar, fo pregadi et posto parte per li savii tutti d'acordo di risponder a Zuam Alberto che eramo contenti ponersi nel suo signor, qual dovesse formar li capitoli, et nui saremo d'acordo, et cussì have tutto il consejo.
     
      [174] Item, fu posto di dar concorente a domino Zuam Campezo dotor, lezeva a Padoa in lege al primo luogo, domino Antonio Francesco di Doctori citadin da Padoa con fiorini ... a l'anno, e fu presa.
     
      Item, fu posto per li consejeri, cai di 40 e savii et quelli a li ordeni, che 'l fusse levato una manzaria toleva el masser di l'armamento per termenation fata per li soi signori, di haver uno soldo per cadaun galioto, etc., et parloe sier Antonio Trun non contra la parte, ma aricorda fusse conza la parte in uno ordine aricordava, e fu conza et fu presa da tuto el consejo.
     
      Item, fu posto per sier Marco Zorzi e sier Beneto Zustignam savii a terra ferma, atento si trovava su Lio 100 stratioti a li qual era stà fato la mostra, che di questi sia cernito li boni, et quelli tolti, el resto sia mandati via, et sier Hieronimo Orio savio da terraferma, sier Bortolo di Prioli et sier Faustin Barbo savii ai ordeni, vol la parte, ma che li cativi siano mandati via pagandoli il nollo, etc. Or io Marin Sanudo savio ai ordeni, andai in renga a contradir, et fu la prima volta, con gran atention, né persi tempo in ringratiar il consejo; narai la qualità di quelli stratioti per haver fato la mostra come tuti erano cativi, e perhò l'opinion mia era mandarli indriedo tutti, et sier Alvise Bragadin procurator savio dil consejo, sier Alvise da Molin et sier Zorzi Corner cavalier savii a terraferma, io Marin Sanudo et sier Marco da Molin savii ai ordeni, et mi rispose sier Faustin Barbo.