Di domino Job, orator dil signor di Faenza. Vene una lettera dimandava licentia di repatriar, et voria la expedition di Dario di l'Aquila contestabile deputato andar a Brixegele.
     
      Vene li do falconieri dil re di Franza; e tochatoli la man per il principe, si partino con Morgante et li 60 falconi, et li fo dato al ditto corier per spexe ducati 110.
     
      In questa matina, atento che per lettere di sier Vetor Bragadin conte di Sibinico et per uno orator qui la Signoria nostra era solicitata a mandar certe munitioni in quella terra, et cussì castigata la poliza, per l'ordine nostro fono balotate.
     
      Da poi disnar fo gran pioza. Li savii si reduse in collegio et consultono la parte di far pagar li debitori de le dexime.
     
      [1498 12 08]A dì 8 dezembrio. In collegio non fo il principe. Vene Piero di Bibiena et portoe una lettera abuta da la sorela, di primo.
     
      Da Fiorenza, a lui drezata, de primo di questo. Come havia scrito Paulo e Vitelozo Vitello erano iti in Casentino; ebbeno ducati 4000 poi ne volse altri 6000 quali Jacomo Nerli li dete de li soi; poi volse 3000 fanti quali promesse mandarli indriedo immediato, et sono reduti tra Prato Vechio in pieve di San Stephano e Arezo et Pisa; non poteno haver fanti paesani per non se fidar; hanno mandà a Bologna Francesco Nerli orator a dimandarli, perhò voria la Signoria rimediasse a questo perché misier Zuane Bentivoy par non vogli darli. Item, la fama esser publica con lo acordo si fa a Ferrara, et il ducha scrisse a Fiorenza la solicitava l'acordo; et mandaria per un'altra le conditione con le qual si dice si farà, zoè le particularità, et conclude la Signoria la desidera, ma aricorda si fazi a modo dil bon sarto che misura assa' fiate prima che taglii.