Item, alcuni homeni d'arme dil signor Zuane di Gonzaga esser lì venuti a dimandar alozamenti, et voleno saper il voler di la Signoria; et li fo scritto dovesse dirli non li voler dar alozamento, et che volendo aconzarsi con altri condutieri nostri potesseno, et etiam questo medemo dovesse dir a quelli fu col marchexe.
     
      Da Padoa, di 7. Zercha li pagamenti di dona Caterina Calergi provisionata lì a la camera per el consejo di X. Come non si poteva per haver quella camera gran spesa, et in tempo di sier Fantim da cha da Pexaro capitano de lì, era stà spexo in mexi 16 duc. 72 milia in spexe di le fabriche di Porzia, di le scuole dil Bo et altrove, et altre spexe extraordinarie.
     
      Dil capitano di le galie di Fiandra sier Jacomo Capelo, date in Antona a dì 4 novembrio. Come da Cades scrisse et crede non si haverà hauto dite letere; et a dì 21 octubrio partite da Cades, et a dì 22 fo a cao San Vincenzo, a dì 23 sora Lisbona, a dì 4 sora cao Finister, et navegando verso Antona con gran fortuna e vento, et a dì 28 si ritrovoe in fondi d'aqua passa 20, et a dì 30 sora Antona scorseno erano zonti in Antona, et in do mexi e mezo che si partì di Puoli lì esser zonto, et come zorni 42 solli hano navigato che era cossa belissima, et li patroni vadagniano assai. Li qual erano Domenego Capelo q. sier Carlo, sier Piero Bragadin q. sier Hieronymo et sier Piero Valier di sier Antonio. Et come le altre do galie haveano hauto qualche senestro in la fortuna, excepto la sua che fu fata per Francesco Rosso, sichè laudava le galie si dovesse far sul sesto di la soa, perché le altre do era di man di Lunardo Brexan; protho hora che non sa far galie; ivi et in Antona ditte nostre galie erano stà ben vedute, e con gran jubilo sperava in 10 mexi compir il suo viazo.